القائمة الرئيسية

الصفحات

سعر ومواصفات سامسونج A51 مميزات وعيوب

سامسونج A51
سامسونج A51


  • المعالج: إكسينوس 9611 ثمانى النواة
  • الرام: 8/6GB
  • التخزين: 128GB
  • الشاشة: 6.5 انش FHD+
  • الكاميرا: 4 كاميرات 48/12/5/5 + 32
  • نظام التشغيل: Android10
  • البطارية: 4000ma

مواصفات سامسونج A51

اول هدية من هدايا سامسونج فى موبايل A51 هى الواجهة الأمامية سامسونج قررت انها توفر لعميل الفئة المتوسطة نفس الواجهة الأمامية اللى كانت بتوفرها لعميل الفلاجشيب شاشة كاملة بدون حواف تقريبا وبالنوتش الجديدة اللى فيها الكاميرا السيلفى.

شكل الواجهة الأمامية قريب جدا من شكل واجهة سامسونج نوت 10 بلس الموبايل اللى سعره 16000 جنيه بس خلينى اقولك ان النوتش فى سامسونج A51 اصغر كمان من النوتش اللى فى سامسونج نوت 10 بلس والنوتش الصغيره دى بتحس مع الوقت انها مش موجودة اصلا وبتوفرلك تجربة شاشة كاملة تماما فما بالك بقى بشاشة من سامسونج خلينا بقى نتكلم عن سعر ومواصفات سامسونج A51 بالتفصيل.

تانى حاجه البصمة المدمجة فى الشاشة واللى ادائها اتحسن شوية عن الاصدار القديم سامسونج A50 فى حاجتين مهمين اولا بقت اسرع شوية من سامسونج A50 مش بقول انها اسرع بصمة ولكن بقت افضل بشكل ملحوظ والحاجه الأهم انها مبقتش تغلط وبتتعرف على صباعك من اول مرة تقريبا.

اخر حاجة فى الواجهة الأمامية هى سماعة المكالمات اللى بتيجى فوق النوتش بِسُمك صغير جدا واللى ممكن متشوفهاش اصلا وده كان باختصار مواصفات A51

تصميم سامسونج A51

سامسونج A51 بيجى بظهر من البلاستيك وهو ظهر بيجمع بين انه ظهر بلاستيك ولكن بيوفر شكل واحساس الظهر الزجاجى.

طبعا كخامات مش افضل حاجة كل الموبيلات تقريبا اللى فى نفس الفئة السعرية بتيجى بظهر زجاجى ومع ذلك فيه ناس كتير بتحب الظهر البلاستيك لأنه بيكون عملى اكتر وبيستحمل اكتر من الزجاج ولكن كتصميم سامسونج تفوقت على نفسها وعملت فرق واضح بينه وبين سامسونج A50 الظهر بيجى بلمعة الزجاج وبتدرج فى الألوان مع وجود خطوط مائلة بتقسم اللون وبتخليه بدرجتين مختلفين فى كل ناحية تصميم غريب يخليك تحب الموبايل.

الكاميرات بتيجى فوق على الشمال جوه فريم خاص بيها ومعاهم الفلاش 4 كاميرات عاملين تصميم حرف L جوه الفريم وبروز الكاميرات بسيط جدا هيختفى بمجرد ما تركب الجراب اللى بيجى مع الموبايل والموبايل متحاوط بفريم بلاستيك بارز بروز بسيط عن جسم الموبايل.

تصميم سامسونج A51

مسكة الموبايل فى الايد مريحة جدا وبتحس انه موبايل صغير فى ايدك على الرغم من حجم الشاشة الكبير وده طبعا بسبب الاستغلال الشاشة اللى بدون حواف.

سُمك الموبايل ووزنه يعتبرو قليلين وأقل من كل المنافسين تقريبا وزن الموبايل حوالى 178 جرام وسُمك الموبايل اقل من 8 مللى.

اما عن ألوان سامسونج A51 فموجود منه الاسود والبينك والابيض والازرق.

رائى فى التصميم بشكل عام هو ان سامسونج تفوقت فى كل حاجه على كل الموبيلات المنافسة ماعدا حاجه واحدة وهى ان ظهر الموبايل من البلاستيك مش من الزجاج.

شاشة سامسونج A51

الموبايل جاى بشاشة عملاقة حجمها 6.5 بوصة بدقة FHD+ وكثافة بكسلات 405 بكسل لكل انش وعليها طبقة حماية جوريلا جلاس 3 ولكن لا تدعم HDR

شاشة سامسونج A51

تجربة الشاشة تجربة جميلة ومختلفة وبتوفرلك تجربة مشاهدة افضل طبعا من الشاشات اللى فيها النوتش القديم ومن حيث الألوان شاشات سامسونج الأموليد معروفة طبعا بالوضوع وتشبع الألوان ولكن سامسونج بقالها فترة من وقت ما نزلت سامسونج M30S بتخلى الوضع الأساسى اللى بينزل بيه الموبايل بتكون فيه الوان الشاشة هادية شوية عن الأول واعتقد انهم عملو كدا بحيث تبقى مريحة اكتر للعين ومع ذلك تقدر تزود تشبع الوان الشاشة من الاعدادات ومن حيث الاضائة فأضائة الشاشة عالية جدا ومفيهاش اى مشكلة.

اداء سامسونج A51

الموبايل جاى بمعالج Exynos 9611 بتقنية 10 نانو ميتر ومعاه معالج رسوميات (GPU) Mali-G72 ودول نفس المعالجات الموجودة فى سامسونج M30S واللى سعره ارخص بحوالى 1500 جنيه ودى طبعا نقطة تحسب على سامسونج وده عشان سعر موبايل سامسونج A51 ميغلاش عن كده.

طيب هل معنى الكلام ده ان الاداء سيئ لا الاداء هيبقى حلو وسلس بالنسبة لمعظم الناس فى التصفح والتنقل بين التطبيقات لكن طبعا لو هتقارن بحاجات تانية فى نفس الفئة زى شاومى مى 9 او ريلمى xt فالاداء فى الموبيلات دى هيكون اسرع بفرق بسيط لأن المعالجات اللى فيها اقوى من معالج سامسونج A51

اداء سامسونج A51

خلينا نقول انه كأداء مفيهوش مشكلة وكمان مع وجود حجم رامات 6 جيجا رام بيخليك تقدر تسيب تطبيقات اكتر فى الخلفية وتتنقل بينها من غير ما السوفت وير يضطر ان يقفل التطبيق ويفتحه تانى.

المساحة الداخلية للموبايل 128 جيجا وكمان تقدر تركب كارت ميمورى لحد 1 تيرا ومش محتاج تشيل الشريحة التانية عشان تركب الكارت الميمورى.

اما عن اداء الألعاب انا جربت عليه 3 العاب بجربهم على اى موبايل اول لعبة اسفلت 9 لعبتها على اعلى اعدادات جرافيك وكان الاداء سلس ومفيهوش مشكلة تانى لعبة جربتها كول أوف ديوتي بتقدر تلعبها على جرافيك High وعلى فريم ريت High وكان ادائها برضو سلس ومفيش اى مشكلة وانا بلعب اللعبة كانت مستقرة معايا جدا ومفيهاش اى تهنيج اما تالت لعبة هى ببجى بتقدر تلعباه لحد HDR و Ultra فريم ريت ودى حاجة جامدة جدا فى البداية لعبتها على الاعدادات دى وكان ادائها سلس ولكن بعد شوية هتحس بتقطيع فريمات بسيط وانت بتلعب.

كاميرات سامسونج A51

سامسونج A51 جاى بأربع كاميرات خلفية كاميرا اساسية 48 ميجا بكسل بفتحة عدسة F/2.0 وكاميرا تانية 5 ميجا بكسل بتساعد على العزل والكاميرا التالتة 12 ميجا بكسل بفتحة عدسة F/2.2 بتساعد على والكاميرا الرابعة 5 ميجا بكسل للتصوير عن قرب او التصوير المايكرو اما الكاميرا السيلفى 32 ميجا بكسل فتحة عدسة F/2.2

اقوى ميزة موجودة هى ان الكاميرا السيلفى بتصور فيديو لحد 4K مش بس الكاميرا الخلفية ودى حاجة مش موجودة فى اى موبايل تانى فى نفس الفئة السعرية.

كاميرات سامسونج A51

تانى اقوى ميزة هى الوضع الليلى والميزة هنا انه بيشتغل فى 3 اوضاع وضع الكاميرا الأساسية ووضع الكاميرا الوايد انجل ووضع الكاميرا السيلفى ومعتقدش ان فيه موبايل تانى فى نفس الفئة السعرية بيقدر يعمل كدا.

تالت ميزة هى وضع السوبر ستيدى موشن وده وضع بيثبتلك تصوير الفيديو تثبيت الكترونى قوى جدا بحيث يخليك تقدر تصور فيديو وانت بتجرى مثلا او وانت بتتحرك بشكل سريع.

بطارية سامسونج A51

الموبايل جاى ببطارية حجمها 4000 مللى امبير وبتدعم الشحن السريع وبيجى مع الموبايل شاحن سريع 15 وات واللى بيشحن الموبايل من 0 لحد 100% فى حوالى ساعتين لكن انا من رأيى انه كان المفروض وقت الشحن يقل شوية عن كده.

من حيث الاستهلاك بقى فبصراحة معجبنيش اوى ساعات هتلاقى الموبايل بيكمل معاك اليوم لكن لو قرصت عليه فى الاستخدام مش هيكمل معاك اليوم للاخر وهتضطر انك تشحنه شوية تانى فى اخر اليوم علشانيكمل معاك.

صوت سامسونج A51

سماعة سامسونج A51

صوت سماعة المكالمات عالى وواضح كمان مخرج الهاند فرى بيطلع برضو صوت عالى وواضح وكمان ممكن تحسن الصوت فى اكتر عن طريق خاصية Dolby Atmos لكن مبتشتغلش الا مع الهاند فرى فقط اما صوت السماعة الخارجية فنقدر نقول ان صوتها عالى لكن مش اعلى حاجه.

سعر سامسونج A51

سامسونج a51 ب 5350 جنيه ولكن من عادة سامسونج انها بتسعر الموبايل تسعير عالى شوية عن قيمته الحقيقية وتسيبه اسبوعين او تلاته وبعد اسبوعين كمان بيبدأ سعر الموبايل فى النزول واحده واحده فأنا متوقع ان سعر A51 بعد شهر تقريبا او اكتر سعر سامسونج A51 هينزل عن 5000 جنيه يعنى ممكن يستقر عند 4900 او 4800 جنيه وفى الحالة دى هيكون الموبايل يستاهل سعره جدا وهيكون واحد من افضل الاختيارات فى الفئة السعرية دى.

مميزات سامسونج A51

موجود نوتش سامسونج نوت 10 بلس.

اندرويد 10 اللى لسه منزلش لموبيلات الفلاجشيب.

كاميرا سيلفى بتصور لحد 4K

عيوب سامسونج A15

استهلاك البطارية مفروض يكون افضل من كدا.

صوت السماعة الخارجية ادائها اقل من موبيلات فى نفس الفئة السعرية.

تعليقات