القائمة الرئيسية

الصفحات

سعر ومواصفات ريلمي c3 مميزات وعيوب ريلمي سي 3

 

ريلمي c3
  • المعالج: ميديا تك G70
  • الرام: 3GB
  • التخزين: 64GB
  • الشاشة: 6.5 بوصة +HD
  • الكاميرا: 3 كاميرات 2/2/12 + 5
  • نظام التشغيل: Android 10
  • البطارية: 5000MA

مواصفات ريلمي c3

التصميم

ريلمى C3
ريلمى c3 بيجى بلونين الأحمر والأزرق والحقيقة اللونين اجمل من بعض وتصميم الموبايل بيجمع بين البساطة والجمال تحس ان فيه شعاع خارج من الكاميرات الخلفية وريلمى بتقول انها استنبطته من شروق الشمس وللأسف مش بيجى فى العلبة بتاعة الموبايل جراب بالتالى هتكون حرص اثناء استخدامك للموبايل وخصوصا ان فيه بروز واضح جدا للكاميرات الخلفية وكمان فيه بروز واضح للشاشة عن جسم الموبايل.

سُمك ريلمى c3 يعتبر سُمك عادى على الرغم من وجود بطارية عملاقة 5000 مللى امبير وكمان الموبايل مقاوم لرذاذ الماء البسيط.

شاشة ريلمي c3

ريلمى C3

الشاشة IPS LCD 6.5 بوصة بدقة 720×1600 بكسل وكثافة 270 بكسل فى كل بوصة.

شاشة ريلمي سي 3 جودتها جيدة بنوتش على شكل حرف v مع حواف كبيرة نسبيا وتحديدا الحافة السفلية اللى تعتبر كبيرة ولكن فى الفئة السعرية دى اتعودنا على وجود حافة كبيرة من الاسفل فى اى موبايل انما الوان الشاشة وادائها كانوا كويسين جدا مع المحتوى المرئى والألعاب.

السماعة الخارجية

موجودة اسفل يمين ريلمي سي 3 وصوتها عالى ولكن جودتها متوسطة مع الصوتيات اللى فيها موسيقى وخصوصا لو كانت موسيقى صاخبة اوى او فيديوهات فيها موسيقى اكشن انما لو هتسمع عليها محتوى مسموع (كلام) فالصوت هيكون عالى وواضح اما لو هتسمع افلام او موسيقى صاخبة شوية فهتحتاج انك توطى الصوت شوية علشان تسمعه بشكل كويس.

بالنسبة لسماعة المكالمات صوتها عالى وواضح جدا والمايك كمان بتاع المكالمات صوته عالى وواضح جدا.

ريلمى C3

تقدر تسجل المكالمات بشكل مدمج فى النظام ولكن هتحتاج تفعل الميزة دى من برنامج المكالمات وتروح للاعدادات بتاعت البرنامج وتفعل خاصية تسجيل المكالمات.

تقدر تظبط الفلاش بحيث لو استقبلت مكالمة الفلاش ينور ويطفى علشان الناس الكبيرة فى السن اللى ممكن تكون مبتسمعش التلفون وخصوصا لو كان بعيد عنها فممكن لما يشوف النور بتاع الفلاش يعرفوا ان فيه اتصال.

بصمة ريلمى c3

بصمة الريلمى c3 كأداء ممتازة وسريعة جدا ودقيقة ولكن تصميم البصمة تقريبا زى سطح ضهر الموبايل فلما تيجى تفتح الموبايل بالبصمة وخصوصا فى عدم وجود جراب احيانا هتغلط ومش هتحط صباعك على البصمة بشكل مظبوط فتحس ان البصمة ادائها مش كويس ولكن لو حطيت صباعك على مستشعر البصمة بشكل صحيح الموبايل هيفتح بدقة وسرعة.

الامكانيات الداخلية

الذاكرة 64 جيجا مع 3 جيجا رام و 3 كاميرات وبصمة الموبايل كمان بيدعم تركيب شريحتين مع كارت ذاكرة خارجى.

معالج ريلمي c3

بالنسبة للمعالج الريلمي c3 اول موبايل ينزل بالمعالج الجديد من ميديا تك فى عائلة المعالجات المخصصة لل Games

بصمة ريلمى C3

ميديا تك عملت معالجات مخصصة لل Games وهى عائلة ال G المعالج اللى موجود فى ريلمي c3 هو Helio G70 ثمانى النواة بمعمارية 12 نانو ميتر وتردد 2 جيجا هرتز.

اداء المعالج معانا فى الاستخدام العادى كان ممتاز جدا ومفيش فيه اى مشاكل وتجربتنا مع الألعاب الاداء كان مرضى ومكنش فيه مشكلة.

واجهة المستخدم

الواجهة اصبحت اقرب كتير جدا من الواجهة الخام الخاصة بجوجل وواجهة ريلمى بتيجى بنظام اندرويد 10 وفيها مزايا كتير جدا صعب اننا نتكلم عنها كلها.

لو حبيت تعمل اسكرين شوت هتسحب ب 3 صوابع على الشاشة.

ولو حبيت تقفل الشاشة هتضغط مرتين على الشاشة ولو عايز تفتحها هتضغط مرتين برضو عشان تفتحها.

تقدر وهيا الشاشة مقفولة انك ترسم مجموعة من الحروف عشان تعمل مجموعة من الوظائف على سبيل المثال هترسم حرف O عشان تفتح الكاميرا او هترسم حرف V عشان تشغل الفلاش بتاع الكاميرا.

كمان تقدر تصور الشاشة فيديو ودى نقطة مهمة تقدر انك تستعين بيها لو حابب انك تشرح حاجة بتعملها على الموبايل.

بطارية ريلمى c3

بالنسبة للبطارية اللى موجودة فى الموبايل هى 5000 مللى امبير والحقيقة اداء البطارية هى اعظم حاجة فى ريلمى c3

اداء ممتاز جدا الموبايل فضل شغال 4 ايام وشوية مع الاستخدام العادى وكان لسه فيه حوالى 53% فى البطارية وده يعتبر اداء ممتاز جدا فى الفئة السعرية دى.

كاميرات ريلمى c3

كاميرات ريلمى c3

الكاميرات الموجودة فى الموبايل هم 3 كاميرات كاميرا رئيسية 12 ميجا فتحة عدسة F1.8 وبتصور فيديو لحد دقة 1080

الكاميرا التانية هى كاميرا مايكرو 2 ميجا والكاميرا الثالثة مخصصة للبورتيريه وهى 2 ميجا فتحة عدسة F2.4.

الكاميرا السيلفى 5 ميجا فتحة عدسة F2.4 وبتصور فيديو لحد دقة 1080 واداء الكاميرات كان مرضى بما انها فئة اقتصادية.

هل يستحق الشراء

الريلمي c3 ممتاز جدا بما انه موبايل فى الفئة الاقتصادية وبيقدملك مجموعة من المزايا زى ما اتكلمنا عنها ولكن يعاب ان الموبايل مش معاه جراب.

ريلمي c3 فى الفئة السعرية دى بيمتلك افضل معالج بلا منازع لو انت مش معاك غير 2500 ومش هتعرف تزود عليهم يبقى ده افضل اختيار ليك لأن اسرع موبايل فى الفئة السعرية والموبايل بيمتلك كاميرات خلفية كويسة جدا والبطارية كبيرة جدا و 3 رام و 64 جيجا وشاشة كبيرة وتصميم ممتاز.

سعر ريلمي c3

سعر ريلمي c3 حاليا فى مصر 2500 جنيه مصرى وقد تختلف الأسعار من محلات الى اخرى ننصح بالشراء من الموقع الرسمى لشركة ريلمى.

تعليقات