القائمة الرئيسية

الصفحات

سعر ومواصفات انفنكس نوت 7 مميزات وعيوب انفينكس نوت ٧

 


  • المعالج: Mediatek Helio G70
  • الرام: 6/4GB
  • التخزين: 128/64GB
  • الشاشة: 6.95 بوصة +HD من نوع IPS
  • الكاميرا: 4 كاميرات 2/2/48/16
  • نظام التشغيل: Android 10
  • البطارية: 5000MA

انفنكس نوت 7

بعد تجربتى لموبايل انفنكس نوت 7 اقدر اقولك ان شركة انفينكس بتطور نفسها بشكل محصلش قبل كدا وبدأت تاخد اتجاه جديد وتدخل تنافس بقوة فى وسط المطحنة اللى موجودة دلوقتى.
الموبايل ده فعلا استاهل التجربة وهنوضح مواصفات انفنكس نوت 7 ومميزاته وعيوبه وهنذكر سعر انفنكس نوت 7.

تصميم انفنكس نوت 7

اول ميزة طبعا لازم نقولها هيا التصميم واجهة امامية عبارة عن شاشة كبيرة جدا بحواف قليلة من 3 جهات وحافة سفلية بحجم مناسب.
الكاميرا السيلفى موجودة فى النوتش اعلى يسار الشاشة وحجم النوتش صغير مش كبير.
تصميم انفنكس نوت 7
باختصار كدا دى واجهة امامية مثالية فى السعر دا اما الضهر فجاى بتصميم غير متوقع الحقيقة لون الضهر بيجى بدرجات مختلفة بيفصل بينها خطوط مائلة فيه من الخطوط دى مستقيم وفيه منها منحنى مع لمعه قوية وانعكاسات مع الضوء بتعمل الوان الطيف.
التصميم غريب وجميل فى نفس الوقت دا غير كاميرات انفينكس نوت 7 الخلفية اللى بتيجى داخل فريم دائرى فى منتصف الضهر.
طبعا الضهر مفيهوش بصمة خلفية لأن البصمة بتيجى فى جنب الموبايل ودى اول بصمة جانبية تعملها انفينكس.
انفينكس بالتصميم ده تفوقت على نفسها وعلى كل تصميمتها القديمة.

شاشة انفنكس نوت 7

تانى ميزة فى انفينكس نوت 7 هيا حجم الشاشة وحاليا دى اكبر شاشة موبايل فى الفئة السعرية دى لأن حجم الشاشة 7 بوصة تقريبا مفيش موبايل تانى بيوفرلك شاشة بالحجم دا فى الفئة السعرية دى.
شاشة انفنكس نوت 7
الوان الشاشة واضائتها ممتازة كان نفسى الشاشة تكون FHD لإنها طبعا كانت هتوفر تجربة افضل من حيث الدقة ومش معنى كلامى إن الشاشة مبكسلة او كثافة البكسلات قليلة لا طبعا الرؤية واضحة وتجربة المشاهدة ممتعة لكن كل ما كانت الدقة اعلى مع حجم الشاشة الكبير ده كل ما التفاصيل بتبقى اوضح وتجربة المشاهدة بتعجبك اكتر.

بطارية انفنكس نوت 7

الميزة التالتة فى الموبايل هيا استهلاك البطارية انفنكس نوت 7 جاى ببطارية عملاقة 5000 مللى امبير واستهلاكها ممتاز.
البطارية فضلت شغاله ليوم كامل و 14 ساعة وعملت اكتر من 10 ساعات شاشة مفتوحة وكان لسه كمان فاضل فى البطارية 10% يعنى ممكن تفضل ل3 او 4 ساعات تانى.
البطارية بتدعم الشحن بقدرة 18 وات والشاحن اللى بيجى فى العلبة شاحن 13 وات بيقدر يشحن الموبايل من 0 لحد 100% فى ساعتين وده بالنسبالى وقت كويس جدا على بطارية كبيرة بالحجم ده فيه بطاريات تانية 5000 مللى أمبير بتشحن فى وقت اكبر من ده.

اداء انفنكس نوت 7

رابع ميزة فى انفينكس نوت 7 هيا الاداء اليومى للموبايل حصل تطور كبير من انفينكس فى موضوع المعالج Helio G70 هو صحيح مش اسرع معالج فى الفئة السعرية ولكن هو فى المرتبة التانية بفرق بسيط جدا لو هنقارنه ب Helio G80 الموجود فى ريلمى 6i مثلا وده طبعا بينعكس على الاداء والسرعة فى التصفح وفتح وقفل التطبيقات هتلاقى سرعة يمكن تكون مشوفتهاش قبل كدا من انفينكس.
البصمة سريعة جدا وبتستجيب بمجرد ماصباعك يلمسها وفى كل مره اتعرفت على صباعى ومغلطتش ولا مره تقريبا.

تجربة الألعاب

الميزة المهمة اللى انفينكس مركزه عليها هيا تجربة الألعاب وتجربة الألعاب فى انفنكس نوت 7 تجرية ممتعة وده علشان 3 حاجات اولا اداء المعالج طبعا ببجى مثلا بتشتغل على HD graphics و High frame rate بأداء سلس جدا ومفيهوش اى تقطيع ثانيا حجم الشاشة الكبير اوى دا مخليك شايف كل تفاصيل المشهد جوه اللعبة وموفرلك تجربة رؤية ممتعة ملهاش مثيل فى اى موبايل تانى فى الفئة السعرية دى.

سماعة انفنكس نوت 7

سماعة انفنكس نوت 7
تالت حاجه التجربة الصوتية ودى الميزة رقم 6 السبيكر فى انفينكس نوت 7 اسبيكر استيريو واللى ميعرفش يعنى ايه استيريو يعنى سماعة المكالمات بتشتغل مع السماعة الخارجية فى نفس الوقت بحيث توفرلك صوت مجسم من جميع النواحى وفى نفس الوقت بيبقى اعلى من لو الصوت كان طالع من السماعة الخارجية فقط.
خاصية الستيريو ساوند فى الموبيلات مش بتاخدها الا فى الموبايلات الفلاجشيب فقط فتخيل انك واخد صوت ستيريو ب3000 جنيه.

كاميرات انفنكس نوت 7

انا مش هقول إنها ممتازة ولكن هيا ككاميرا فى الفئة السعرية دى وبالمقارنة بالمنافسين فأداءها جيد ومقبول.
الوانها مشبعة ومقبول والصورة حادة وتفاصيلها كتير.
اكتر حاجه عجبانى فيها إن الألوان حقيقية مش ملعوب فيها لكن وضع ال 48MP الحقيقة ملهوش لازمة ومش بيزودلك التفاصيل فى الصورة فخليك فى الوضع العادى افضل.
نفس الكلام بينطبق على الكاميرا السيلفى ودقتها 16 ميجا بيكسل وبتوفرلك صور كويسة من حيث التفاصيل والوانها بشكل عام مشبعة ولكن لو الجلد مش حقيقى اوى بتلاقيه فاتح اكتر من الحقيقة.
كاميرات انفنكس نوت 7
حساسية مايك المكالمات عالية وبيلقط الصوت بشكل كويس وشبكة المكالمات كانت شغالة معايا كويس جدا ومواجهتش معاه اى مشكلة.
وسنسور التقارب شغال مظبوط وبيطفى الشاشة اثناء المكالمات وكمان سماعة المكالمات كان صوتها عالى وواضح ونقى وكمان بتيجى بحجم عريض علشان لو الموبايل اتحرك على ودنك تقدر تسمع بوضوح والصوت ما يضعفش.
سماعة مكالمات انفنكس نوت 7
مخرج السماعة ال 3.5 مللى بيطلع صوت واضح وعالى لكن مش عالى اوى لكن مع خاصية DTS تقدر تعلى الصوت اكتر ولكن دا بيبقى على حساب جودة ونقاء الصوت نفسه وتقدر تسجل المكالمات من خلال تطبيق المكالمات اللى موجود على الموبايل ودى ميزة لو مش موجودة فى الموبايل نفسه مش هتقدر تنزل تطبيق يعملها من play store.

واجهة انفنكس

واجهة انفنكس بقا شكلها افضل من الأول وبقت بتحتوى على مميزات كتير زى الدارك مود (الوضع المظلم) وتسجيل الشاشة والرد على المكالمات من خلال اشارة بتعملها بإيدك والشريط الجانبى اللى بتقدر تفتح منه اى تطبيق انت عايزه ومميزات تانيه كتير.

الرامات والمساحة

6 جيجا رام و 128 جيجا مساحة داخلية وحاليا مفيش موبايل بسعر 3000 جنيه بيقدم الارقام دى دا غير كمان انك تقدر تركب كارت ميمورى مع شريحتين ومش محتاج تشيل الشريحة التانية وانفنكس كالعادة بتوفرلك فى العلبة كل حاجة ممكن تحتاجها جراب للضهر واسكرين بروتكتور وشاحن وسماعة هاند فرى.

عيوب انفنكس نوت 7

لو كنت عامل حسابك انك هتستخدم الموبايل بإيد واحدة فياريت تنسى الموضوع ده لإن حجم الشاشة كبير جدا وده مخلى الموبايل ضخم وصعب جدا تستخدمه بإيد واحدة
مدخل الشحن واللى بيجى من النوع القديم Micro USB 2.0 انا عارف ان سرعة الشحن كويسة وانها فى المميزات لكن وجود مدخل شحن type c بقت حاجه منطقية فى فئة 3000 جنيه.
الكاميرا السيلفى فى الاضائة الضعيفة الصوره بتكون مليانه نويز والتفاصيل بتروح خالص تقريبا الوضع الليلى كان ممكن يظبط الصورة شوية لكنه للأسف مش شغال مع  الكاميرا السيلفى.
اداء العزل فى انفنكس نوت 7 معجبنيش وبيغلط كتير خصوصا فى الكاميرا السيلفى ساعات بيغلط فى تحديد الفوكس وساعات مبيعملش اى تأثير فى الخلفية وكأنها صورة عادية مش بورتريه ولما بيعمل عزل مش بيحدد الأطراف بشكل دقيق.
عدم وجود كاميرا Wide angel او زاوية عريضة مينفعش فى فئة 3000 جنيه وفى موبايل بأربع كاميرات خلفية انه ميكونش فيه كاميرا Wide angel وكان يفضل بدل وجود كاميرا مايكرو انهم يستبدلوها بكاميرا Wide angel لإنها بتكون مفيدة اكتر.
دقة تصوير الفيديو أخرها FHD فى حين وجود موبيلات تانية فى فئة سعرية اقل بتقدر تصور فيديو بدقة 4K.
لمبة الإشعارات مش بتشتغل الا علشان تعرفك ان الموبايل بيتشحن ومش بتشتغل مع اى اشعار فلو جالك اى اشعار من اى تطبيق مش هتقدر تعرف الا من خلال الصوت.

هل يستحق الشراء

مبدئيا لو انت بتلعب Games كتير فأنا انصحك بيه جدا لأن تجربة اللعب عليه مختلفة عن اى موبايل تانى.
الشاشة الكبيرة دى مع صوت الاستيريو اللى طالع من السماعتين مع اداء محترم وسلس فى اللعبة كل ده مع بعضه بيخليك تستمتع فعلا وانت بتلعب أما لو انت مش Gamer ومحتاج موبايل عملى يبقى كويس فى المكالمات والتصفح واستخدام الفيسبوك والواتس وكده فأنا برضو مش شايف فى الموبايل ما يمنع انه يكون موبايل عملى جدا.
الأداء العام للموبايل مع استهلاك البطارية والمساحة الداخلية الكبيرة وجودة شبكة المكالمات كل ده مع بعضه هيوفرلك كل اللى انت محتاجه من تجربة استخدام قوية وعملية جدا.
الحاجة الوحيدة اللى ممكن تخليك متشتريش انفينكس نوت 7 هيا انك تكون عايز افضل كاميرات فى الفئة السعرية دى كاميرات الموبايل جيدة ولكن مش هيا الأفضل.

تعليقات